ଘାସଫୁଲ ପତ୍ରିକାର ପ୍ରତିଷ୍ଠାତା ସଂପାଦକ, ଓଡ଼ିଶା ବିଧାନସଭାର ପୂର୍ବତନ ବିରୋଧୀଦଳ ଉପନେତା ବିଷ୍ଣୁ ସେଠୀ ଥିଲେ ସାଧାରଣ ଜନତାର ନିରବ ବେଦନା ଓ ଅବ୍ୟକ୍ତ ଯନ୍ତ୍ରଣାକୁ ଶବ୍ଦରୂପ ଦେଉଥିବା ଜଣେ ସମ୍ବେଦନଶୀଳ କବି । ସର୍ବଦା ତାଙ୍କ କବିତାର କେନ୍ଦ୍ରରେ ରହୁଥିଲେ ସମାଜର ଅତି ସାଧାରଣ ମଣିଷମାନେ । ସେମାନଙ୍କ କମ୍ପିତ ସ୍ୱରର କବିତା, ଅକୁହା କାହାଣୀ ଓ ଜଞ୍ଜାଳପୂର୍ଣ୍ଣ ଜୀବନାନୁଭୂତିକୁ ସାମୂହିକ ସ୍ୱରରେ ପରିଣତ କରିବା ପାଇଁ ୨୦୦୯ ମସିହାରେ ସେ ପ୍ରତିଷ୍ଠା କରିଥିଲେ ଘାସଫୁଲ ପତ୍ରିକା । ପତ୍ରିକାର ନାମକରଣରେ ତାଙ୍କ ଆତ୍ମ-ଦର୍ଶନ ଅନ୍ତର୍ନିହିତ ।
ପ୍ରଚଣ୍ଡ ଗ୍ରୀଷ୍ମକାଳରେ ତୀବ୍ର ଜ୍ୱାଳା ସହିତ ପଥିକମାନଙ୍କର ପଦତଳେ ଦଳିଚକଟି ନିଃଶେଷ ପ୍ରାୟ ହୋଇ ମଧ୍ୟ ପୁନଶ୍ଚ ଅଙ୍କୁରି ଉଠୁଥିବା ଘାସ ଭିତରେ ଯେଉଁ ପ୍ରାଣପ୍ରାଚୁର୍ଯ୍ୟ ଭରି ରହିଥାଏ, ତାହାର ଯଥାର୍ଥ ବାବଦୂକ ହେଉଛି ଘାସଫୁଲ । ଘାସଫୁଲ ପତ୍ରିକା କେବଳ ସମ୍ଭ୍ରାନ୍ତ ଓ ପ୍ରତିଷ୍ଠିତ ସାହିତ୍ୟସାଧକଙ୍କ ନିମନ୍ତେ ଉଦ୍ଦିଷ୍ଟ ନ କରି ଉଜ୍ଜ୍ୱଳ ସମ୍ଭାବନାରେ ପରିପୂର୍ଣ୍ଣ ନବାଗତଙ୍କ ପାଇଁ ଏହାକୁ ଏକ ମାଧ୍ୟମ ଭାବେ ସେ ଗଢ଼ିତୋଳିଥିଲେ। ଏହା ହିଁ ଥିଲା ପତ୍ରିକାର ପ୍ରତିଷ୍ଠାତା ମାନନୀୟ ବିଷ୍ଣୁ ସେଠୀଙ୍କର ସ୍ୱପ୍ନ; ତାହା ହିଁ ଆମର ସଂକଳ୍ପ ।